पर्यटन प्रवद्र्धनका लागि नेपालगञ्जमा ‘वेष्टर्न ट्राभल मार्ट’को आयोजना हुने भएको छ । नेपाल पर्यटन बोर्ड, नेपालगञ्ज उपमहानगरपालिकाको आयोजना तथा पर्यटन विकास परिषद् लुम्बिनी प्रदेश, नेपालगञ्ज उद्योगा वाणिज्य सङ्घ, होटेल एसोसियसन र होटेल व्यवसायीसँग बाँकेको सहकार्यमा नाट्टा बाँकेले तेस्रो संस्करणका रुपमा उक्त मार्ट आयोजना गर्न लागेको हो ।
यही जेठ २४, २५ र २६ गते आयोजना हुन लागेको मार्टमा भारतको पर्यटकीय शहर बनारस, अयोध्या, लखनउ र गोरखपुरबाट ४० जना बढी टुर अपरेटर सहभागी हुने वेष्टर्न ट्राभल मार्ट मूल समितिका संयोजक श्रीराम सिग्देलले जानकारी दिए । उनले त्यसका लागि ‘टेक्नीकल सेसन’समेत सञ्चालन हुने उल्लेख गर्दै सहभागी पर्यटकलाई बाँके र बर्दियाका राष्टिय निकुञ्जको भ्रमण गराइने बताए ।
संयोजक सिग्देलले यसबाट प्राकृतिक सौन्दर्य र वन्यजन्तुको विविधता उजागर हुने तथा कर्णाली नदीमा ¥याफटिङको अनुभव आदान प्रदान हुनुका साथै त्यसले साहसिक पर्यटनलाई प्रवद्र्धन गर्ने बताए । मार्टमा आएका पर्यटकलाई नेपालगञ्जमा रहेका क्यासिनो र प्रमुख होटलको समेत अवलोकन गराइने आयोजकले जनाएका छन् ।
“यसले नेपालगञ्ज र समग्र लुम्बिनी प्रदेशको पर्यटन विकासमा महत्वपूर्ण योगदान दिन्छ भन्ने विश्वास लागेको छ”, उनले भने । नेपालगञ्जलाई कर्णाली प्रदेशको पर्यटन प्रवेशद्धारका रुपमा स्थापित गर्दै बाँकेलाई पर्यटकीय गन्तव्य बनाउने लक्ष्य लिएको उल्लेख गर्दै सिग्देलले मार्टमा परम्परागत खानाको प्रर्दशनी हुनुका साथै नेपालगञ्जको त्रिभुवनचोकमा पहिलोपटक ‘स्ट्रिट फूड लेन’ सञ्चालनमा आउन लागेको जानकारी दिए ।
संयोजक सिग्देलले त्यसका लागि सुरुमा २० व्यावसायिक स्टल हुने जनाउँदै नेपालगञ्जमा पाइने सबै स्वाद स्ट्रिट फूड लेनमा हुने बताए । यसअघि पनि नाट्टा बाँकेले वेष्टर्न ट्राभल मार्टको आयोजना गरेको थियो । तीन दिन हुने मार्टमा रु ३५ लाख खर्च हुने अनुमान गरिएको छ ।
