भारतका गृहमन्त्री अमित शाहले बुधबार अनन्तनागस्थित सरकारी मेडिकल कलेज (जीएमसी) अस्पताल पुगेर पहलगाम आतङ्कवादी आक्रमणमा घाइते भएका व्यक्तिहरूको अवस्था बुझेका छन् ।
मङ्गलबार पहलगामको बाइसारन घाँसे मैदानमा भएको आतङ्कवादी आक्रमणमा केही व्यक्तिको ज्यान गएको थियो भने धेरैजना घाइते भएका थिए । सन् २०१९ को पुलवामा हमलापछि यो कश्मीर उपत्यकामा भएको सबैभन्दा ठूलो आक्रमण मानिएको छ ।
बुधबार बिहान गृहमन्त्री शाह घटनास्थल बाइसारन मैदान पुगेका थिए । उहाँ हेलिकप्टरमार्फत हवाई निरिक्षण गर्दै प्रत्यक्ष रुपमा मैदानको अवस्थाबारे जानकारी लिनुभयो ।
त्यसअघि, श्रीनगरको प्रहरी नियन्त्रण कक्षबाहिर आयोजित श्रद्धाञ्जली कार्यक्रममा गृहमन्त्री शाहले मृतकप्रति श्रद्धाञ्जली अर्पण गरे र पीडित परिवारजनहरूसँग भेट गरे ।
उहाँले सामाजिक सञ्जाल ‘एकस’ मार्फत शोक व्यक्त गर्दै भारत आतङ्कवादका अगाडि झुक्ने छैन भन्ने दृढ प्रतिबद्धता व्यक्त गर्नुभयो ।
यता, रक्षामन्त्री राजनाथ सिंहले राष्ट्रिय सुरक्षा सल्लाहकार अजीत डोभाल, वायु सेनाका प्रमुख एपी सिंह लगायत उच्च अधिकारीहरूसँग बैठक गरी क्षेत्रको सुरक्षा स्थितिको समिक्षा गरेका छन् ।
यसैबीच, राष्ट्रिय अनुसन्धान एजेन्सी (एनआईए) को टोली पनि घटनास्थल पुगेको छ । यो हमला पछिल्ला लगभग २० वर्षको अवधिमा नागरिकहरूलाई लक्षित गरी गरिएको सबैभन्दा घातक मानिएको छ ।
