राष्ट्रियसभा सदस्य वामदेव गौतमले मुलुकलाई आर्थिक रुपमा माथि उठाउन समाजवाद निर्माणमा ढिलाइ गर्न नहुने बताएका छन् । उनले हालको राजनीतिक अस्थिरता र कमजोर आर्थिक अवस्थाका कारण जनतामा वितृष्णा बढेकोले समाजवादको निम्ति काम सुरु गर्नुपर्ने बताए ।
गौतमले राष्ट्रपति, प्रदेश प्रमुख र पालिका प्रमुख प्रत्यक्ष निर्वाचित हुनुपर्ने तथा अन्य सदस्य पूर्ण समानुपातिक निर्वाचन प्रणालीबाट आउनुपर्ने धारणा राखे । उनले प्राप्त मतका आधारमा राजनीतिक पार्टीले व्यक्ति पठाउने र प्रतिनिधिसभामा १५ जना तथा राष्ट्रियसभामा १० जना सांसद भए पर्याप्त हुने बताए ।
उनले कम्युनिस्ट पार्टीहरूलाई एकीकृत गर्ने अभियान जारी रहेको जानकारी दिँदै नेकपा (एकीकृत समाजवादी) सँग एकताको निम्ति छलफल भइरहेको बताए । उनले आफू गृहमन्त्री हुँदा देशको शान्ति सुरक्षामा ध्यान दिएको र अहिले नेताहरूले गुण्डाहरूलाई पार्टीमा ल्याएको आरोप लगाए ।
गौतमले संविधान संशोधनका विषयमा सरकार स्पष्ट हुनुपर्ने र समानुपातिक निर्वाचन प्रणाली हटाउन नहुने बताए । उनले वर्तमान निर्वाचन प्रणाली खर्चिलो भएको भन्दै यसमा सुधार गर्नुपर्ने धारणा राखे । युवाको विदेश पलायनलाई ठूलो समस्याको रूपमा लिन नहुने र समाजवाद आएपछि उनीहरू फर्कने विश्वास व्यक्त गरे ।
