अभिनेता विपिन कार्कीले चलचित्र ‘ऊनको स्वीटर’ मा पूर्वी नेपालको सुन्दरता र संस्कृतिलाई देख्न पाइने बताएका छन्।
चलचित्रको ट्रेलर सार्वजनिक गर्दै कार्कीले चलचित्रमा ‘गुरुङसेनी’ युवती र ‘काफ्ले ब्राह्मण’ युवकबीचको प्रेम सम्बन्धमा आउने जातीय अन्तर्विरोधको कथा समेटिएको बताएका छन्।
कार्कीले भने, “गीतसङ्गीतझैँ सरल र सहज कथामा चलचित्र बनेको छ। यसले दुई दशक अगाडिको समयमा फर्काउँछ र त्यसबेलाको एउटा ग्रामीण परिवेशसँग परिचित गराउँछ। यो चलचित्र हेर्नेसँगै अनुभूति गर्ने किसिमको बनेको छ।” उनले पछिल्लो समय आइरहेका भन्दा नितान्त भिन्न भूमिकामा आफू चलचित्रमा देखिने बताए।
उक्त चलचित्रका निर्देशक नवीन चौहानले चलचित्रमार्फत आफूले कल्पना गरेको संसारलाई दर्शकसम्म पु¥याउन लागेको बताए। उनले भने, “मैले सोचेको एउटा संसारलाई चलचित्रको पर्दामा ल्याएको छु। यो पात्र र यहाँको परिवेश मेरो कल्पना र यथार्थ हुन्। गीतसङ्गीतमार्फत् कथा भन्दै गर्दा यसपटक ठूलो पर्दामा आएका छौँ।”
पूर्वी नेपालको पाँचथर जिल्लामा छायाङ्कन गरिएको चलचित्रमा अभिनेता कार्कीसँगै अभिनेत्री मिरुना मगर, परीक्षा लिम्बू, विल्सनविक्रम राई, सुनिल पोखरेल, माओत्से गुरुङ, प्रेम सुब्बालगायतका कलाकारले अभिनय गरेका छन्।
अभिनेत्री मगरले उक्त चलचित्रमा आँखालाई शीतलता, कानलाई कर्णप्रिय सङ्गीतसहित पाँचथरको एक समाजको कथालाई देखाइएको बताइन्। उनले बाल्यकाल नै विदेशमा बिताएकाले यसपटक छुट्टै संसारमा बाच्न पाएको र आफ्नो ‘पात्र’अनुसारको भूमिका सफलतापूर्वक पूरा गरेको बताइन्। चलचित्रले गुरुङ–मगर र बाह्मण समुदायको संस्कृति र आपसी सद्भावलाई झल्काउने कोशिस गरेको उनको भनाइ छ।
उक्त चलचित्रमा गीतसङ्गीत निर्देशकको भूमिका गायक सुजन चापागाईंले निर्वाह गरेका छन्। निर्माण पक्षका अनुसार यही वैशाख २६ मा नेपालसहित विदेशमा समेत सो चलचित्र प्रदर्शन हुनेछ।
