अमेरिकी राष्ट्रपति डोनाल्ड ट्रम्पको प्रशासनले हार्वर्ड विश्वविद्यालयलाई उपलब्ध गराइने दुई अर्ब डलरभन्दा बढीको संघीय कोष रोक्का गर्ने निर्णय गरेको छ। विश्वविद्यालयले ह्वाइट हाउसद्वारा प्रस्तुत गरिएका मागहरूको सूची अस्वीकार गरेपछि यो कदम चालिएको हो।
गत हप्ता, ह्वाइट हाउसले हार्वर्डलाई क्याम्पसमा कथित यहूदी विरोधी भावनासँग जुध्न भन्दै विश्वविद्यालयको शासन प्रणाली, भर्नाका तौरतरिका र प्रक्रियाहरूमा परिवर्तन गर्न मागहरूको सूची पठाएको थियो।
तर, हार्वर्ड विश्वविद्यालयले सोमबार ती मागहरू अस्वीकार गर्यो। विश्वविद्यालयका एक अधिकारीले भने, "हामीले प्रशासनलाई उनीहरूको प्रस्तावित सम्झौता स्वीकार नगर्ने जानकारी दिएका छौं। विश्वविद्यालयले आफ्नो स्वतन्त्रता वा संवैधानिक अधिकार त्याग्ने छैन।" हार्वर्डको यही अस्वीकृतिपछि ट्रम्प प्रशासनले संघीय कोष रोक्का गर्ने निर्णय लिएको हो।
यो घटना ट्रम्प प्रशासनको नीतिगत दबाबलाई अस्वीकार गर्ने पहिलो प्रमुख अमेरिकी विश्वविद्यालय बनेको छ। राष्ट्रपति ट्रम्पले पछिल्लो समय गाजा युद्ध र इजरायललाई अमेरिकी समर्थनको विरोधमा भएका कलेज प्रदर्शनहरूका बीच विश्वविद्यालयहरूले यहूदी विद्यार्थीहरूलाई पर्याप्त सुरक्षा प्रदान गर्न नसकेको भन्दै आलोचना गर्दै आएका थिए। प्रशासनले हार्वर्डलाई पठाएको पत्रमा मागहरू पूरा नगरे सरकारसँगको आर्थिक सम्बन्ध जोखिममा पर्ने चेतावनी समेत समावेश थियो।
