पाकिस्तानको राजधानी इस्लामाबाद र देशका उत्तरी क्षेत्रहरूमा बुधबार भीषण असिनापानीले जनजीवन प्रभावित बनाएको छ । असिनापानीले सवारी साधन र बालीनालीमा व्यापक क्षति पुर्याएको छ भने तीव्र वर्षाका कारण शहरी क्षेत्रमा बाढीको खतरा बढेको छ ।
कडा हावाहुरी र वर्षासँगै आएको असिनापानीले रावलपिंडी र इस्लामाबादका जुम्ल्याहा शहरका साथै पाकिस्तानका अन्य धेरै क्षेत्रहरूमा असर पुर्याएको छ। राजधानी शहरमा ठूलाठूला असिनाका कारण सवारी साधनका सिसाहरू फुटेका छन् भने रुखहरू ढलेका कारण यातायात अवरुद्ध भएको छ ।
इस्लामाबादमा अचानक आएको असिनापानीले कार, सौर्य प्यानल र आवासीय सम्पत्तिलगायत अन्य पूर्वाधारमा व्यापक क्षति पुर्याएको छ। भारी वर्षासहितको असिनापानीले पाकिस्तानका उत्तरी भागका धेरै शहरहरूमा प्रभाव पारेको छ। कडा हावाहुरी र ठूलाठूला असिनाका कारण संघीय राजधानी इस्लामाबादका अधिकांश भागमा क्षति पुगेको छ।
पाकिस्तानका पूर्व जलवायु परिवर्तन मन्त्री शेरी रहमानले असिनापानी गोली जस्तो परेको बताउनुभएको छ। "यो जलवायु परिवर्तनका कारण उत्पन्न भएको चरम मौसमी अस्थिरता हो, जहाँ असामान्य घटनाहरू बढ्छन्। यो कुनै प्राकृतिक घटना मात्र होइन। उत्सर्जन जस्ता मानवीय गतिविधिहरूका कारण यो बढेको हो," सामाजिक सञ्जाल एक्समा उनले लेखेका छन्।
असिनापानीका कारण गाडीहरूमा व्यापक क्षति पुगेको छ, धेरै कारका सिसाहरू फुटेका छन्। आवासीय क्षेत्रमा घरका झ्यालका सिसाहरू फुटेका कारण सामान्य जीवनयापनमा बाधा पुगेको छ। भारी वर्षा र हावाहुरीका कारण इस्लामाबाद र यसका आसपासका धेरै क्षेत्रमा विद्युत आपूर्ति बन्द भएको छ र विद्युत आपूर्ति सुचारु गर्ने प्रयास भइरहेको छ। प्रतिवेदनका अनुसार अधिकारीहरूले विद्युत आपूर्ति सुचारु गर्ने काम गरिरहेका छन्, तर सौर्य पूर्वाधार र धेरै क्षेत्रहरूमा विद्युतीय ग्रिडमा भएको क्षतिलाई मर्मत गर्न समय लाग्न सक्छ।
पाकिस्तान मौसम विज्ञान विभाग (पीएमडी) ले बुधबारदेखि देशको उत्तरी भागमा वर्षा, हावाहुरी र मेघगर्जनको सम्भावना रहेको बताएको थियो । अप्रिल १८ देखि २० सम्म इस्लामाबाद, रावलपिंडी र अन्य शहरहरूमा धुलो, मेघगर्जन र वर्षाको सम्भावना रहेको पूर्वानुमान गरिएको थियो।
