पाकिस्तानमा केएफसी रेस्टुरेन्टहरूमा भएका श्रृंखलाबद्ध आक्रमणमा संलग्न भएको आरोपमा १६० जनालाई पक्राउ गरिएको छ। सरकारले शनिबार दिएको जानकारी अनुसार आक्रमणमा एक कर्मचारीको गोली हानी हत्या गरिएको छ।
गाजामा युद्ध सुरु भएदेखि नै केएफसी इस्लामवादी दलहरूको विरोध र बहिष्कारको निशाना बनेको छ। प्रदर्शनकारीहरूले केएफसीलाई इजरायलका लागि अमेरिकी समर्थनसँग जोडेका छन्।
उप गृहमन्त्री तलाल चौधरीले पाकिस्तानभर कुल २० वटा घटना भएको र एकजना कर्मचारीको मृत्यु भएको जानकारी दिए। घटनामा संलग्न रहेको आरोपमा पञ्जाब प्रान्तमा १४५ जना र इस्लामाबादमा १५ जनालाई पक्राउ गरिएको छ।
चौधरीले ती रेस्टुरेन्टहरूले सबै कुरा स्थानीय स्तरमा प्राप्त गर्ने र पाकिस्तानी कर्मचारीहरूलाई रोजगारी दिने भएकाले आक्रमण गर्नु गलत भएको बताए। आक्रमणको उद्देश्य र घटनाको थप अनुसन्धान भइरहेको प्रहरीले जनाएको छ।
