अमेरिकी राष्ट्रपति डोनाल्ड ट्रम्पले बेइजिङमाथि ‘पर्याप्त’ भन्सार शुल्क घटाउने सम्भावनाको सङ्केत गरेको एक दिनपछि वासिङ्टनसँग व्यापार वार्ताका लागि ढोका ‘व्यापक रूपमा खुला’ भएको चीनले बुधबार बताएको छ ।
आफ्नो आक्रामक व्यापार नीतिबाट विश्व बजारलाई थप राहत दिँदै ट्रम्पले मङ्गलबार अमेरिकी फेडरल रिजर्भका अध्यक्ष जेरोम पावेललाई बर्खास्त गर्ने कुनै इरादा नभएको बताएका थिए ।
जनवरीमा ह्वाइट हाउसमा फर्किएयता ट्रम्पले चीनबाट आउने धेरै उत्पादनमा एक सय ४५ प्रतिशतको अतिरिक्त भन्सार शुल्क लगाएका छन् । यसमा सुरुमा फेन्टानिल आपूर्ति शृृङ्खलामा चीनको कथित भूमिकामाथि लगाइएको भन्सार शुल्क र पछि वासिङ्टनले अनुचित ठानेका अभ्यासहरू समावेश छन् ।
बेइजिङले अमेरिकी सामानहरूमा एक सय २५ प्रतिशतको व्यापक प्रति–भन्सार शुल्कका साथ प्रतिक्रिया दिएको छ, तर बुधवार व्यापार वार्तामा संलग्न हुन इच्छुक रहेको दोहो¥याएको छ । “चीनले भन्सार शुल्क युद्ध र व्यापार युद्धमा कुनै विजेता नभएको प्रारम्भिक रूपमा औँल्याएको थियो”, चिनियाँ विदेश मन्त्रालयका प्रवक्ता गुओ जियाकुनले बेइजिङमा दैनिक पत्रकार सम्मेलनमा भनिन्, “वार्ताका लागि ढोका व्यापक रूपमा खुला छ ।”
चिनियाँ राष्ट्रपति सी जिनपिङले बुधबार व्यापार युद्धले ‘सबै देशको वैध अधिकार र हितलाई कमजोर पार्छ, बहुपक्षीय व्यापार प्रणालीलाई चोट पु¥याउँछ र विश्व आर्थिक व्यवस्थालाई असर पार्छ’ भनी चेतावनी दिएका छन् । ट्रम्पले एक सय ४५ प्रतिशत ‘धेरै उच्च’ स्तर हो र त्यो ‘उल्लेखनीय रूपमा तल आउनेछ’ भनेर स्वीकार गरेपछि बेइजिङबाट यो पुनः पुष्टि आएको हो । “तिनीहरू त्यो सङ्ख्याको नजिक कतै पनि हुने छैनन् तर यो शून्य हुने छैन”, उनले भने, “अन्ततः तिनीहरूले एउटा सम्झौता गर्नुपर्छ किनभने अन्यथा, तिनीहरू संयुक्त राज्य अमेरिकामा सम्झौता गर्न सक्षम हुने छैनन् ।”
अर्थमन्त्री स्कट बेसेन्टले मङ्गलबार एक कार्यक्रममा भन्सार शुल्कहरू पारस्परिक व्यापार प्रतिबन्धको मात्रामा पुगेको बताएपछि ती टिप्पणीहरू आएका हुन् । उक्त कार्यक्रममा रहेका एक व्यक्तिका अनुसार बेसेन्टले निकट भविष्यमा तनाव कम हुने अपेक्षा गर्नुभएको थियो । उनले प्रेसका लागि खुला नभएको जेपी मोर्गन चेसको आयोजनामा भएको कार्यक्रममा यस्तो विकासले बजारहरूलाई केही राहत दिनुपर्ने बताए ।
पावेलविरुद्ध ट्रम्पको हालैका तीव्र आलोचनाले निष्कासनको डरलाई बढाएको थियो जसले आक्रामक व्यापार नीतिहरूले पहिल्यै तर्सिएका बजारहरूमा झन् चिन्ता फैलाएको थियो । ह्वाइट हाउसको व्यापक भन्सार शुल्क नीतिले सम्भवतः मुद्रास्फीतिको पुनरुत्थान गर्ने चेतावनी दिएकामा रिपब्लिकन राष्ट्रपति ट्रम्पले पावेलको आलोचना गर्नुभएको थियो । “उहाँलाई बर्खास्त गर्ने मेरो कुनै इरादा छैन”, मङ्गलबार ट्रम्पले भने, “म ब्याज दरहरू कम गर्ने उहाँको विचारको सन्दर्भमा उहाँ अलि बढी सक्रिय भएको हेर्न चाहन्छु–यो ब्याज दरहरू कम गर्ने सही समय हो । यदि उहाँले त्यसो गर्नुभएन भने, के यो अन्त्य हो ? होइन ।”
अन्तर्राष्ट्रिय मुद्रा कोष र विश्व बैंकको वसन्त बैठकहरूको छेउमा बेसेन्टको व्यापार टिप्पणीहरूको प्रतिवेदन आएपछि वाल स्ट्रिटका प्रमुख सूचकाङ्कहरूमा उछाल आयो । बुधबार एसियाली बजारहरू सर्वत्र बढे । हङकङ र टोक्योका मुख्य सूचकाङ्कहरू दुवै लगभग दुई प्रतिशतले बढे भने सुनको मूल्य घट्यो । लगानीकर्ताहरूले आफ्नो परम्परागत सुरक्षित आश्रय खोजेको एक दिनपछि सुनको मूल्य रेकर्ड उच्च स्तरमा पुगेको थियो ।
बेसेन्टले बेइजिङसँग दिनको अन्त्यमा धेरै गर्न बाँकी रहेको बताए तर उनले निष्पक्ष व्यापारको आवश्यकतालाई उल्लेख गर्नुभयो र चीनले आफ्नो अर्थतन्त्रलाई पुनः सन्तुलनमा ल्याउन आवश्यक रहेको बताए । व्यापार तनाव बढेका कारण हालै दुवै देशबीच कन्टेनर बुकिङ घटेको उल्लेख गर्दै उनले चीनसँग सम्बन्ध विच्छेद गर्ने लक्ष्य नभएको जोड दिए । ह्वाइट हाउसका प्रेस सचिव क्यारोलिन लेभिटले पनि वासिङ्टनले ‘चीनसँगको सम्भावित व्यापार सम्झौताको सन्दर्भमा धेरै राम्रो गरिरहेको’ पत्रकारहरूलाई बताए ।
विश्वका वित्त मन्त्रीहरू र केन्द्रीय बैंकरहरू यस हप्ता वासिङ्टनमा भेला हुनेछन् । ट्रम्पको नयाँ र व्यापक–दायरा भएको भन्सार महसुलसँग देशहरूले जुझिरहेको बेला साइडलाइनमा व्यापार वार्ताको प्रगतिमा सबैको ध्यान केन्द्रित हुनेछ । चीनका विदेशमन्त्री वाङ यीले मङ्गलबार आफ्ना बेलायती र अस्ट्रियाली समकक्षीहरूसँग फोन वार्ता पनि गर्नुभयो र बेलायत र युरोपेली सङ्घलाई अन्तर्राष्ट्रिय व्यापारको संरक्षणमा बेइजिङसँग काम गर्न आग्रह गर्नुभयो । जापानले पनि अर्को हप्ता भन्सार महसुल दूत रियोसेई अकाजावाको वासिङ्टनको दोस्रो भ्रमणलाई हेरिरहेको थियो । स्थानीय मिडियाले टोकियोले ट्रम्पलाई शान्त पार्न छुटहरूबारे विचार गरिरहेको रिपोर्ट गरेको थियो ।
