भारतीय क्रिकेट टोलीका स्टार ब्याट्सम्यान विराट कोहलीले टेस्ट क्रिकेटबाट सन्यास लिन चाहेको खबर सार्वजनिक भएको छ।
द इन्डियन एक्सप्रेसका अनुसार कोहलीले भारतीय क्रिकेट बोर्ड (बीसीसीआई) लाई आफ्नो निर्णय जानकारी गराइसकेका छन्, तर बोर्डका उच्च अधिकारीहरूले उनलाई पुनर्विचार गर्न आग्रह गरेका छन्।
स्रोतले बताए अनुसार, "कोहलीले आफ्नो मन बनाइसकेका छन् र बोर्डलाई टेस्ट क्रिकेटबाट अलग हुन चाहेको जानकारी दिएका छन्। तर, बीसीसीआइले आगामी इङ्गल्याण्ड भ्रमणलाई मध्यनजर गर्दै उनलाई आफ्नो निर्णय पुनर्विचार गर्न आग्रह गरेको छ। उनी यस अनुरोधमाथि विचार गर्दैछन्।"
यो खबर रोहित शर्माले केही दिनअघि टेस्ट क्रिकेटबाट सन्यास लिएपछि आएको हो। भारतको चयन समितिले आगामी महिना इङ्गल्याण्डमा हुने पाँच टेस्टको शृंखलाका लागि केही दिनमा टोली चयन गर्ने तयारी गरिरहेको छ।
कोहलीले यस वर्षको सुरुमा अस्ट्रेलियामा भएको बोर्डर गावस्कर ट्रफीदेखि नै आफ्नो टेस्ट भविष्यबारे सोचिरहेको बताइएको छ। उनले पहिलो टेस्टमा शतक बनाएपछि राम्रो प्रदर्शन गर्न सकेका थिएनन्।
यदि कोहलीले आफ्नो निर्णय परिवर्तन नगरे र रोहित पनि टोलीमा नभए, शीर्ष क्रममा केएल राहुल, शुभमन गिल र यशस्वी जैसवालसँगै मध्यक्रममा अनुभवको कमी हुनेछ, र ऋषभ पन्तले तल्लो क्रम सम्हाल्नेछन्। यसबाहेक, टोलीले ११ वर्षसम्म टेस्ट टोलीको नेतृत्व गरेका दुई अनुभवी खेलाडीको मार्गदर्शन पनि गुमाउनेछ। कोहलीले डिसेम्बर २०१४ मा भारतको टेस्ट कप्तानी सम्हालेका थिए भने रोहितले फेब्रुअरी २०२२ मा।
यसअघि द इन्डियन एक्सप्रेसले चयनकर्ताहरूले नयाँ टेस्ट चक्रका लागि युवा खेलाडीलाई कप्तान नियुक्त गर्ने तयारी गरिरहेको खबर प्रकाशित गरेको थियो, त्यसपछि रोहितले सन्यासको घोषणा गरेका थिए। स्रोतका अनुसार शुभमन गिल टेस्ट कप्तान बन्ने दौडमा अगाडि छन्।
३६ वर्षीय कोहलीले भारतका लागि १२३ टेस्ट खेलेका छन् र ४६.८५ को औसतमा ९,२३० रन बनाएका छन्। तर, पछिल्लो पाँच वर्षमा उनको प्रदर्शन खस्किएको छ र उनले ३७ खेलमा तीन शतकसहित १,९९० रन मात्र बनाएका छन्। अस्ट्रेलिया भ्रमणमा उनले पाँच टेस्टमा औसत २३.७५ रन मात्र बनाएका थिए।
कोहलीले गत वर्ष वेस्ट इन्डिजमा भएको टी-२० विश्वकप जितेपछि टी-२० अन्तर्राष्ट्रिय क्रिकेटबाट सन्यास लिएका थिए। तर, यस आईपीएलमा उनले ११ खेलमा ३ अर्धशतकसहित १४३.४६ को स्ट्राइक रेटमा ५०५ रन बनाएका छन्।
