अमेरिकाको टेक्सास राज्यको दक्षिण-मध्य क्षेत्रमा आएको अचानक बाढीका कारण ठूलो मानवीय क्षति भएको छ। स्थानीय अधिकारीहरूका अनुसार, शुक्रबार बिहान आएको बाढीमा परी अहिलेसम्म १३ जनाको मृत्यु भइसकेको छ। ग्वाडालुपे नदीको किनारमा रहेको एक ग्रीष्मकालीन बाल शिविरमा सहभागी भएका २० भन्दा बढी बालिकाहरू अझै सम्पर्कमा आउन सकेका छैनन्।
केर जिल्लाका शेरिफ ल्यारी लाइथाले थप व्यक्तिहरू हराइरहेका हुन सक्ने भएकाले मृतकको सङ्ख्या अझ बढ्न सक्ने सम्भावना रहेको बताएका छन्।
टेक्सास राज्यका उपराज्य प्रमुख ड्यान प्याट्रिकका अनुसार, ग्वाडालुपे नदीको पानीको सतह एकैचोटि २६ फिटले बढेपछि शिविरमा सहभागी करिब ७५० बालिकामध्ये २३ जना सम्पर्कविहीन छन्। मृत्यु हुनेहरूमा केही बालबालिका पनि परेका छन्।
शिविरका प्रमुखले बाढीका कारण त्यहाँ पानी, विद्युत् तथा सञ्चार सेवा पूर्णरूपमा अवरुद्ध भएको सन्देश पठाएका छन्।
हाल बाढीबाट प्रभावित क्षेत्रमा ठूलो सङ्ख्यामा उद्धारकर्मी परिचालन गरिएको छ। सयौँ सुरक्षाकर्मी तथा दर्जनौँ उड्ने साधनको माध्यमबाट उद्दार कार्य जारी छ।
स्थानीय प्रशासनले बाढी प्रभावित क्षेत्रमा नजान सबै नागरिकलाई अनुरोध गरेको छ, किनभने धेरै सडकहरू अवरुद्ध छन्।
विज्ञहरूका अनुसार, जलवायु परिवर्तनका कारण अत्यधिक वर्षा, बाढी, खडेरी, आँधी र गर्मीका लहरहरू बारम्बार र बढी तीव्र रुपमा देखिन थालेका छन्।
