आइतबार इन्डियन प्रिमियर लिग (आईपीएल) मा मुम्बई इन्डियन्स (एमआई) र रोयल च्यालेन्जर्स बैंगलोर (आरसीबी) ले आ-आफ्नो खेलमा प्रभावशाली जित दर्ता गर्दै अंक तालिकामा सुधार गरेका छन्। मुम्बईले चिर प्रतिद्वन्द्वी चेन्नई सुपर किंग्स (सीएसके) लाई वानखेडे स्टेडियममा ९ विकेटले पराजित गर्यो भने बैंगलोरले पञ्जाब किंग्स (पीबीकेएस) लाई ७ विकेटले हराउँदै आफ्नो अघिल्लो हारको बदला लियो।
चेन्नई सुपर किंग्सले टस जितेर पहिले ब्याटिङ गर्ने निर्णय गर्यो। रविन्द्र जडेजाले अविजित ५३ रन र शिवम दुबेले ५० रन बनाएपछि चेन्नईले २० ओभरमा ५ विकेट गुमाएर १७६ रनको योगफल तयार पारेको थियो। युवा ब्याट्सम्यान आयुष म्हात्रेले १५ बलमा ३२ रनको योगदान दिए। तर, मुम्बईका जस्प्रित बुमराहले उत्कृष्ट बलिङ गर्दै ४ ओभरमा २५ रन खर्चेर २ महत्वपूर्ण विकेट लिए। उनले शिवम दुबे र महेन्द्र सिंह धोनीलाई एकै ओभरमा आउट गरे।
१७७ रनको लक्ष्य पछ्याएको मुम्बईले उत्कृष्ट ब्याटिङ प्रदर्शन गर्यो। रोहित शर्मा र सूर्यकुमार यादवले अविजित अर्धशतक प्रहार गर्दै टोलीलाई सहज जित दिलाए। रोहितले ४८ बलमा ६ चौका र ३ छक्कासहित अविजित ७६ रन बनाए भने सूर्यकुमारले मात्र ३० बलमा ८ चौका र ५ छक्कासहित ६८ रनको विस्फोटक पारी खेले। उनीहरूले ११४ रनको साझेदारी गरे। मुम्बईले १७.४ ओभरमा १ विकेट गुमाएर लक्ष्य पुरा गर्यो।
दिनको अर्को खेलमा रोयल च्यालेन्जर्स बैंगलोरले पञ्जाब किंग्सलाई ७ विकेटले पराजित गर्यो। पञ्जाबले पहिले ब्याटिङ गर्दै २० ओभरमा ६ विकेट गुमाएर १५७ रन बनाएको थियो। प्रिन्स आर्यनले २२ र प्रभसिमरन सिंहले ३३ रन बनाए पनि अन्य ब्याट्सम्यानले राम्रो प्रदर्शन गर्न सकेनन्। बैंगलोरका स्पिनर क्रुनाल पाण्ड्या र सुयश शर्माले २-२ विकेट लिएर पञ्जाबलाई कम स्कोरमा रोक्न महत्वपूर्ण भूमिका खेले।
१५८ रनको लक्ष्य पछ्याएको बैंगलोरले १९.२ ओभरमा ३ विकेट गुमाएर लक्ष्य पुरा गर्यो। देवदत्त पाडिक्कलले ३५ बलमा ६१ रन बनाए भने विराट कोहलीले ५४ बलमा ८ चौकासहित अविजित ७३ रनको योगदान दिए। उनीहरूले १०६ रनको साझेदारी गरे। पाडिक्कलले २२ इनिङपछि पहिलो आईपीएल अर्धशतक बनाए।
यी नतिजासँगै मुम्बई र बैंगलोर दुवै टोली अंक तालिकामाथि उक्लिएका छन् भने चेन्नई र पञ्जाबले भने प्रतियोगितामा निरन्तरताका लागि संघर्ष गर्नुपर्ने देखिएको छ।
